Ternan flutti túsundtals ferðafólk á ovastevnu

Strandferðslan fegnast um, at ferðslan um Nólsoyarfjørð á ovastevnuni 2026 gekk væl, hóast nógv fólk ferðaðust til og úr Nólsoy farna vikuskiftið.

Við serligari ferðaætlan og eykatúrum eydnaðist tað væl at flyta stóra fólkamongd á tryggan og góðan hátt. Tað var serliga frá leygarmorgni og fram til sunnumorgun, at nógv trýst var á siglingini, men hóast hetta varð ferðslan avgreidd uttan stórvegis trupulleikar. Í alt flutti Ternan 6522 ferðafólk frá leygarmorgni til sunnumorgun.

Strandferðslan vil takka góða samstarvið, og somuleiðis manningini umborð á Ternuni og starvsfólkum á landi fyri eitt stórt arbeiði í sambandi við ovastevnuna.

Eisini fegnast vit um, at vit saman við starvsfólkum og ferðafólkum megnaðu at fáa eina væleydnaða ovastevnusigling. Okkara mál er altíð at tryggja eina støðuga og álítandi tænastu, eisini tá nógv trýst er á siglingini.