Vandamikil farmur

Av trygdarávum er tað av størsta týdningi, at tú sum ferðandi ella um tú ætlar at flyta farm við Strandferðsluni, fylgir teimum mannagongdum og treytum, ið eru galdandi fyri ferðafólka- og farmaflutning.

Bæði avsendarin (t.e. fyritøka, felag ella persónur) og flutningsfelagið, ið skal flyta vandamiklan farm við Strandferðsluni, hava fulla ábyrgd at tryggja, at galdandi mannagongdir og treytir vera fylgdar.

Vandamikil farmur verður fluttur við Strandferðsluni í samsvar við viðtøkurnar í altjóða IMDG-kotuni, og skal tí altíð fráboðast - og í góðari tíð!

Hvat er vandamikil farmur

Vandamikil farmur er alt ferðagóðs ella farmur, ið kann seta starvsfólk, ferðafólk og umhvørvið í vanda, tí hetta er:

• eldfimt
• eitrandi
• spreingikvæmt
• etsandi
• smittandi
• umhvørvisdálkandi
• geislavirki

Eitt nú hesar vørur koma undir vandamiklan farm:

• Spreingievni
• Fýrverk
• Gas
• Asfalt
• Lithiumbattaríir
  
  

Skipan av flutningi

Farma- og ferðagóðs umvegis farmastøðir og avgreiðslur hjá Strandferðsluni

Skal vandamikil farmur flytast við okkara skipum, skalt tú seta teg í samband við okkara farmastøðir ella farmaavgreiðslur, ið kunnu vegleiða um galdandi mannagongdir og treytir.

Sí yvirlit yvir farmastøðir og avgreiðslur her.

Egin flutningur ella flutningur við flutningsfyritøku

Skal fyritøka ella persónur sjálv/ur skipa flutningin ella flyta vandamiklan farm við flutningsfyritøku, er tað sera umráðandi at boða viðkomandi farmastøð, avgreiðslu ella skipi frá, at talan er um vandamiklan farm.

Tað er strangliga bannað at fara ella koyra umborð á okkara skip við vandamiklum farmi, uttan frammanundan at hava fráboðað flutningin á røttum stað, og at okkara mannagondir verða fylgdar.

Sí eisini:

Leigutúrar við vandamiklum farmi
Gass í húsvognum
Vandamikið ferðagóðs í bussum

Eftirlit

Strandferðslan tekur sær full rættindi at eftirkanna allan farm fyri at tryggja sær, at galdandi lóggáva verður hildin. 

Flutningsfør ella farmur, ið ikki hava fráboðað ætlaðan flutning við vandamiklum farmi ella ikki hava latið Strandferðsluni fráboðanarskjøl sambært viðtøkunum í IMDG - koduni, vera noktað flutning.

Fráboðan og tíðarfreistir

Tað kann taka upp til 7 dagar frá tí at vandamilil farmur er fráboðaður Strandferðsluni, til endaliga loyvið verður givið til at avskipa farmin. Vanliga tekur hetta tó væl minni tíð, um tann, ið skal flyta vandamiklan farm, fráboðar okkum hetta í góðari tíð og fylgir mannagongdunum.

Fráboðanarskjøl

IMDG kodan (International Maritime Dangerous Goods) ásetur m.a. at viðkomandi og røtt útfylt skjøl ella váttanir skulu fylgja vandamiklum farmi. Avskipari hevur ábyrgd av, at skjølini eru røtt og at skjølini fylgja farminum. Eisini hevur avskipari ábyrgd av at farmurin, ið skal førast, er rætt pakkaður, rætt frámerktur og er skikkaður til flutning.

Tann, ið hevur pakkað farmin, skal vátta á skjalinum "IMDG váttan fyri vandamiklð góðs", at farmurin er pakkaður sambært galdandi ásetingum.

Tak niður váttan fyri flutning av vandamiklum farmi. Skjalið skal útfyllast og síðani sendast til avvarðandi farmastøð.
Tá skjalið er góðkent av farmstøð og skipi, verður váttanin send avskipara. Somuleiðis skal avskipari tryggja, um hann sjálvur flytur farmin umborð á ferjuna, at yvirmaður á dekki fær avrit av váttanini og farmastøð fær avrit av váttanini.

IMDG váttan fyri vandamikið goðs

Spyr um tú ivast

Um tú ivast um vøra ella farmur er umfatað av reglum fyri vandamiklan farm, kanst tú altíð seta teg í samband við okkum, sí yvirlit yvir farmastøðir og avgreiðslur her.